Слики што продаваат: како да го фотографираш огласот
3 мин читање
Огласите со добри слики се отвораат неспоредливо почесто. Еве што прави разлика.
Фотографирај дење, надвор, никогаш во темна гаража. Најдоброто светло е наутро или доцна попладне — тврдото пладневно сонце прави сенки, а блицот ноќе прави слики што изгледаат како да криеш нешто.
Исчисти го предметот пред сликање. Измиен автомобил, средена соба или телефон без отпечатоци кажува „домаќински чувано“ — а тоа е половина од одлуката на купувачот.
Сликај од повеќе агли: напред, назад, страна, внатрешност. Кај возилата задолжително таблата со километри; кај становите — прозорците и погледот, не само мебелот.
Не користи филтри и не скривај мани. Гребаницата што ќе ја видат на слика гради доверба; истата гребаница откриена во живо ја убива продажбата.
И држи го телефонот хоризонтално — широките слики изгледаат подобро на секој екран.